洪牛威（業餘動物管理員）
想喺大上大落嘅市況考吓自己眼光，若然用期指落場炒，冇錯就係最直截了當，不過風險就無限大，少D本錢同膽汁都唔掂當；
若然只用認購／認沽期權長倉（LC／LP）落場炒，冇錯就係有限風險；之但係就要擔心，大戶會把引伸波幅（IV）舞高弄低（一旦縮窩，博中咗方向都可以坐艇），分分鐘月頭開咗倉，俾縮窩陰乾到月底就慘情！
因此，用牛熊證嚟博弈，因為有自動止蝕機制（預先訂定強制收回價作為風險管理），又唔使擔心甚麼縮窩，就變咗係本土老散至愛嘅炒賣方向工具！
之但係，因為牛熊證係一種長倉期權（只不過度身訂造），亦須遵守一定的法則方可加強勝算。
從失敗中汲取的經驗話我知，
1）牛熊證只宜玩指數，最好係恒指；
2）月初揀牛熊應該選擇打靶價（收回價）距離現價最少5％（否則夜晚冇教好瞓）；
3）換股比率大於10000（即係升跌都慢D）；
4）到期日最少180天就差唔多;
其他的因素相對次要；而到了月底就可以把戰略改為進取D，日後會再講！
或謂：條件咁嚴謹，揀唔揀得到㗎？
答案係：當然可以!
例如69143恒指法興牛，收回價係恒指25900，穩陣程度好似騎單車戴咗頭盔，但係都有10嘅倍槓桿比率估中都可威威，又要威又要戴頭盔，此之謂也！
69143昨天收0.074元，升4.23％！每手股數係10000。
威威看恒指今星期仲有得彈，年底69143到期（尚餘204天）前, 目標看再升50／100％！
（免責聲明：牛熊證買賣可升可跌，上述看法非是買入、賣出或邀約的建議，純粹是技術研討課題而已。）
Chart courtesy of Megahubhk.com （按圖放大）
