【讓字彈飛】宇子飛:人民幣貶值是冰山一角!紫金大難不死必有後福!

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

yuen

圖片來源:rahims

八月十一日,16:00,期指未收市就嗱臨熄報價機,事關晨早約了班老友Happy hour聚一聚、嘆紅酒;於是急急腳趕去酒吧,費事遲到又俾人「將軍」就「囉爆」!

點不知,老友訂咗嗰張大聲吹水都唔怕嘈嘅檯,鬼影都冇隻!怕者班友仔諗住我實遲到,索性嘆慢版、他他條過來?豈料剛把杯house wine倒滿,都未開始飲,班嘩鬼就逐一殺到;人未到,聲先到嘅赫然係陳騰!

騰兄在老遠已開口,叫道:「子飛,我剛返家攞咗支Year 2000嘅Bordeaux珍藏過嚟益您,今晚勢必不醉無歸!」

我省起2000年份的法國波爾多葡萄酒,一度被FT紅酒投資人譽為「兩全其美:優質卻不特別昂貴」,喜出望外道:「嘩!多謝晒!唔駛問,梗係有值得慶祝嘅事情發生,一於等齊人就一齊嘆嘆可也!」

話口未完,就聽見醒王「哈哈大笑」聲音從身後傳來,道:「子飛,託您嘅鴻福,我呢個門外漢先至話有份見識吓,究竟2000年嘅法國波爾多係醇成點?及同埋有資格飲埋一份添!」

我未嚟得切答醒王,響另一邊經已見到囂士老遠同我打招呼,道:「哈囉子飛,唔好意思,嚟遲咗!陳Sir一發輪過我、話有醇酒嘆,我即時放低晒做緊嘅東西、「飛的」趕過嚟,都算夠老友鬼鬼呱?」

我從未聽過囂士會咁客氣,叫騰兄為陳Sir,一怔道:「究竟因乜解究,您哋個個都好似知道,有值得慶祝嘅事情發生咗、剩得我一頭霧水,快快從實招來,否則大刑侍候!」

醒王故作神秘,沉聲道:「為咗表示對子飛嘅敬意,我諗騰兄會誠意邀請子飛,先試試支2000年波爾多,再慢慢長話短說,您哋點睇?」

隨即聽見各人齊起哄!我也樂得做「頭啖酒」試酒人,先浮一大白,一字一語道:「天可憐見,真的需要感恩!竟讓我有幸品嚐得到這美酒!原來世上果然有醇美、醇厚及醇香的「三全其美」葡萄酒!真的多謝騰兄!」

陳騰欣然道:「子飛,應該係我話多謝先啱數!若然唔係您早排(八月六日)喺網誌爆響口,話明,人民幣定期早走早着 ,我邊有咁醒,及時響尋日(8月10日)將所有人仔存款轉為美元定期?」

跟着騰兄也瞇眼享受着手上杯紅酒,慢條斯理道:「否則,怕者今早一宣佈話,人仔兌美元中間價大幅下調1136點子或1.86%,報6.2298(創有史以來最大降幅)嘅時候,我肯定唔捨得將身家一半嘅人仔定期存款斬纜,就分分鐘坐艇坐到水中央,輸到阿媽都唔認得!真係走得摩無膝頭哥!」

yuenchart

人仔兌美元中間價八月十一日大幅下調1136點子或1.86%,報6.2298(創有史以來最大降幅)!

我放下心頭大石,欣然道:「點解您會等到尋日先至斬咗個定期?坦白講,如果您信咗我嘅分析、怕中共高官為咗要打沉班走資派,會用到七傷拳最勁嗰招:把人仔貶值,您應該坐言起行,嗱嗱臨響七號就做咗決定;之但係,如果您唔buy我嘅觀點,怕者您尋日都唔會落實呢個果斷行為,諗落確真係有啲奇怪噃!」

陳騰望一望囂士,沉聲道:「其實我做決定前係有問過囂士,及醒王嘅意見;但係囂士話,人類係冇預知嘅能力,人仔係咪真係隨時貶值講唔埋;所以,佢叫我三思而後行;我冇怪佢,因為呢啲東西真係好難講!」

跟住他再自斟另一杯酒,開心道:「好在我前日再請教醒王,佢就直截了當咁話,子飛近排睇市奇準,六月十二日話A股泡沫分分鐘爆破,12日之後果真就見頂回落;就算最近(7月21日)2.2元叫入隻紫金礦業(2899),雖說落首打三更、瞬即坐艇(七月廿八日低見2元),但係因為話明,跌破2元才止蝕,結果2899近日於2元、2.01元及2.02元三次到底不破下,昨日已返家鄉,且高見2.32元,算係有驚無險!醒王話子飛佢咁好運,佢嘅意見的確係跟得過!」

「醒王佢一言驚醒夢中人,令我省起自己隻2899都履險如夷,於是昨天及時做咗沽清手頭上所有人仔嘅英明抉擇!」

只聽見醒王及囂士齊聲和應,道:「最後我哋兩個都跟風,清晒人仔定期,所以話全靠子飛您和陳Sir,我哋先可以咁他條響度嘆番杯靚酒,真係不知人間何世!」

我欣然回應:「好運啫,大家唔駛客氣,可以話,今日嘅貶值係冰山一角、陸續有來;因為非如此這般貶值,走資潮會變本加厲,實情係,同官方講嘅谷出口係冇必然關係㗎!」


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments