六月十四日、星期天，下午茶約了幾個老友聚一聚，諗住論盡政改外，齊齊飲杯茶、食個包，不亦樂乎？
殊不知，政改話題對於佢哋嚟講再了無新意 (明知冇真普選、無人會蠢到袋住先)；原來，老友們最有興趣講嘅，仍然係個市點睇？
我哋講話嘅內容，其實亦不乏發人深省嘅角度，不如分享如下？
話說老友陳騰，一坐低就一本正經咁開口，道：「子飛，上個星期五臨收市前，無罅整個罅，忽然傳來路邊社消息，似層層咁話，話深港通嗰壇嘢，隨時會馬上開通落實；之後又有傳言煞有介事咁話，話周末期間，人行實會減存款準備金；搞到我當其時抵唔住頸，高追咗D中資股添；點不知，今早上網睇財經，話家陣二大傳聞都係流料；再加埋事後睇番你嘅blog，實牙實齒話A股隨時會爆煲，睇怕聽日自己D貨實冇運行、坐梗艇；你係真唔係㗎，好大整蠱﹗」
當子飛正想用婉轉嘅說話，先安撫一下老陳嘅沮喪心情之際，老友王醒搶住回應，話：「老陳，人哋子飛晨早用A、H溢價指數，一語中的點出，H股便宜過A股近五成，之後H股指數仲連續兩日跑贏上證指數(連升咗兩日)添；反正你買嘅係H指成份股，你駛唔駛咁騰雞先？」
老陳聽完王醒講 (似乎淡定咗啲)，先舒一口氣，然後話：「若然A股真係到頂，揸H股最多係輸少D，一樣會坐艇，而家高位追入咗，點到我唔驚先？」
說時遲、那時快，另外一個老友李串，邊冷笑邊話：「全中！咁子飛你就唔多幫得落，一邊睇好個後市，一邊睇A股隨時到頂，好矛盾啫；一係就唔好睇好恒指後市買大藍籌；一係就唔好睇淡A股後市，咁搞法，實有一邊中噃，係咪取巧先？」
子飛啼笑皆非，被迫回應：
「老陳，其實位高勢危嘅A股，係越嚟越嚴峻絕對冇點你；冇子彈，D權重股點升先？除咗今個禮拜因有廿五隻新股響星期三發行（包括巨無霸國泰君安），中金公司預計，該批凍結資金總量將再創新股重啟以來新高，或逾六萬億元人仔；此外，尋日中國財經新聞有話，班insider（內幕知情人）越來越狼死，五月以來中國產業資本減持金額高達二千億人仔，其中五月單月減持額就多達一千五百億人仔，環比暴漲近一倍，並創下今年以來月度減持新高添；仲有嘅係，滬深兩市多達一千四百零三名高管(或其親屬)進行了減持股份，（合計減持24億股），由產業資本減持已套現嘅高達五百六十九億元，點到你唔驚先？」
「雖然咁講，話A股瀕臨到頂，其實係靠估，往往要事後先知到幾時出現，此其一；其二係，用一個係人都明嘅比喻嚟講，每個人一出生就註定一步一步咁步向死亡、夠知道死亡係絕對㗎啦！但係知道還知道，都冇偈！唔通知道咗，就會影響每一個人因此而停止食嘢等死？反而最緊要係活得精彩，過好每一天先至係！
同理，明知A股泡沫遲早爆，最多係，只買H股ETF及當時得令嘅藍籌（貪佢哋可順勢升及逆勢可套現快），同埋手頭揸多D現金（目前子飛手頭現金有75％），一邊小心一邊趁調整分段入貨；入了貨就讓子彈飛；就算第日有邊隻唔妥，就以認沽股票期權短倉（SC）作為對沖個別藍籌股；H股ETF則可做國指期貨淡倉，嚟鎖定既得利潤；進可攻、退可守，怕甚麼？」
講完後，班老友你眼望我眼，一齊話，原來用咗對沖基金嘅心法，明晒！（輪到子飛鬆番一口氣！）
圖表源自eSignal （按圖放大）
今周滬深300指數切忌低開低走、例如以尖頂開出低收的陰燭，令上周的跎螺可確認為黃昏之星！果真如是的話，中期浪頂亦可因此而確認！
