略論美國兩份戰略文件及印太局勢(上)(文:飛燕草)

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

 

將一生奉獻畀清人嘅美國傳教士丁韙良 (William Alexander Parsons Martin)(1) ,佢用中文翻譯嘅《萬國公法》(Elements of International Law) 喺一八六五年出版,呢本書立即被引入日本,並且成為暢銷書,自此日本人翻譯外國書籍蔚然成風,日本開始脫亞入歐時代,令日本呢一個小島,有能力同巨無霸滿清及俄國一較高下。而清人喺甲午戰爭中被日本擊敗,號稱「東亞第一堅艦」鎮遠號觸礁報廢,先醒覺要放低大國身段,效法小日本崛起之路。

今年一月,喺美國總統交接前夕,白宮提前二十幾年解密《美國印太戰略框架》(United States Strategic Framework for the Indo-Pacific)文件。幾日前,現任美國總統拜登公佈《國家安全戰略中期指導方針》(Interim National Security Strategic Guidance) 。美軍武功蓋世,呢兩份文件肯定主導往後幾十年嘅世界局勢,又會唔會成為香港人摸黑前行嘅北斗星?

有人曾講過,香港最美嘅風景係人;最,就係比較,就需要力爭上游。令自己有無可取代嘅地位價值,自然可世上通行無阻。研讀分析呢兩份文件,肯定有百利而無一害。

何謂「印太」

為應對中国崛起,2017年當奴侵(Donald Trump,簡稱侵)上任美國總統無耐,就退出跨太平洋夥伴關係 (Trans-Pacific Partnership, TPP),以「印太戰略」(Indo-Pacific strategy) 取而代之。之後美國官員多次公開提及「印度洋及太平洋地區」(Indo-Pacific Region)一詞,泛指印度洋、西太平洋及其周邊廣大區域嘅國家(見下圖),並強調美國將會同日本、澳洲、印度呢三個民主國家,發展更進一步嘅合作關係。由此可見,美國所謂嘅「印太」,即係印度洋同太平洋嘅簡稱。同年12月,白宮公佈《國家安全戰略》(National Security Strategy),正式將「印太」納入官方文件。(2)

 

戰略框架背景及印太形勢

侵上任初期,立即風塵僕僕巡迴亞洲,同各國領導人、政要會面。佢同當時日本首相安倍晉三開會後,雙方都表示同意雙管齊下,喺軍事同雙邊經貿投資關係加強合作;侵亦喺嗰次會面,首次公開提出「印太戰略」,希望可組成美日澳印嘅四國戰略聯盟,建構由中東荷姆茲海峽 (Hormuz Strait)、東南亞馬六甲海峽 (Strait of Malacca) 、到日本台灣之間嘅宮古海峽 (Miyako Strait) 嘅兩洋戰略安全網,藉此應對區域內急速升級嘅威脅同挑戰。(3)

打開《美國印太戰略框架》(以下簡稱《框架》)呢份只有10頁、好似草稿嘅文件,開宗明義指出印太區內嘅挑戰,來自北韓嘅核武同中国嘅崛起,尤其係中国吸取咗滿清嘅教訓,改以定立符合中共戰略需要嘅規則,喺全球發展天朝秩序,同歐美喺連年征戰中發展出來嘅《國際法》及人權自由民主嘅普世秩序抗衡,而天朝秩序已嚴重影響到美國及其印太區內盟友嘅利益。

《框架》中多次提及要保護美國嘅利益。而所謂利益,就係守衛美國本土同海外美國人,阻止核擴散,及重中之重,維持美國喺印太區嘅領導地位,從而確保美國可以進入全球人口最多、發展最快及佔全球經濟三分之一嘅印太區域,喺互利嘅情況下同區內國家進行貿易。

順帶一提,著名作家章家敦 (Gordon Chang) 喺2001年出版嘅《中国即將崩潰》入面,預期過度借貸可令中国經濟喺5年內崩潰。近年,中共大外宣一方面貶低章家敦嘅推論,另一方面搬字過紙,將中国改成美國,散播美國崩潰論,麻醉無知小粉紅。但中国崩潰論對中国成立,對美國卻係九唔搭八。原因在於人民幣嘅價值來自有限嘅美元儲備,假如中共被債主追數,中共必須要還美元,無人會相信人民幣。但美元嘅價值並非來自有限嘅實物,而係來自佢喺全球嘅領導地位,持有美元美債嘅人,相信美國嘅領導地位可令美國政府有能力找數,最壞情況都唔會渣都無。假如美國崩潰論成立,中国政府用支撐人民幣價值嘅美元儲備,不斷大手買入美國國債,噉係唔係扻頭埋牆?明白貨幣即信心嘅人,見到小粉紅講美國崩潰論,真係會好似打完科興疫苗嘅人:深心興奮死。

圖:wikipedia ,https://en.wikipedia.org/wiki/Island_Chain_Strategy 

 

上面提到宮古海峽 ,有必要解釋一下美國「島鏈戰略」。為咗圍堵亞洲東岸,威懾蘇聯(已解體成今日俄羅斯)、中国等共產主義國家,美國前國務卿約翰·科士打·杜勒斯 (John Foster Dulles) 喺1951年提出島鏈概念,以三條假想出來嘅島鏈,作為唔同級别嘅警戒線,佈置唔同嘅軍事設施應對敵人來犯。宮古海峽位於日本台灣之間一段嘅第一島鏈。打開地圖,會發現第一島鏈同東太平洋深淺水區交界重疊,潛艇戰艦要進入菲律賓海,必須經過宮古海峽或巴士海峽,而台灣正正位處兩條海路要衝,係鉗制中共潛水艇同戰艋出太平洋嘅核心,所以台灣對美國安全至關重要,係美國軍事優先協助夥伴。

 

除咗台灣,越南同星加坡都係美國嘅軍事優先協助夥伴。兩國作用顯然而見,星加坡扼守運油船必經嘅馬六甲海峽,越南則同解放軍喺海南嘅潛艇基地對峙。至於解放軍喺青島嘅潛艇基地,當然由日本同南韓兩國負責,無需美國援助。

以目前形勢分析,中国嘅「一帶一路」計劃正改變東南亞各國嘅政治生態,有機會令東南亞成為中国嘅後花園。柬埔寨已可被睇成為中国嘅附庸,長年經濟衰疲,靠中国援助渡日。「人民黨」領䄂洪森喺1993年上台後,一直係柬埔寨首相,2018年更「合法地」解散最大反對黨「救國黨」,變成「人民黨」「一黨專政」。至於馬來西亞,眾所周知馬拉小粉紅氾濫,2018年馬哈蒂爾為首嘅「土著團結黨」同前副總理安華拋開前嫌,組成「希望聯盟」,挾民憤上台改變前朝貪腐;但兩年後,「土著團結黨」內嘅穆希丁聯合前執政聯盟「國民陣線」,將馬哈蒂爾趕落台,政權重回親北京嘅「巫統」(即馬來民族統一機構 UMNO,係「國民陣線」聯盟中最大政黨)手上。

緬甸軍方總司令敏昂萊喺退休前夕,為逃避屠殺羅興亞人嘅責任(4),喺二月發動政變,扼殺剛起步嘅民主制度,槍殺勇敢抗爭嘅緬甸人民,全球嘩然。(按:以下大量數據分析,睇見數字會頭痛嘅朋友可直接跳過呢段,只需要知道經濟上,中国更需要緬甸,緬甸則需要泰國星加坡。)軍方多年來推行社會主義,加上屠殺羅興亞人後被西方國家制裁,緬甸係東南亞數一數二嘅窮國,貿易上長期逆差,但同一般報導有出入,中国雖高踞緬甸出入口榜首,星加坡中国兩國加埋已佔緬甸貿易逆差差唔多百分之六十,即呢兩個國家一直喺緬甸身上賺緊大錢!而貿易收入主要來源來自泰國、印度及香港。外債方面佔緬甸GDP百份之四十,屬健康水平,但當中百分之四十向中国借入,年息4.5厘,對緬甸來講已達大耳窿級數,早兩年緬甸議會審核年度債務報告時,就因此要求政府找咗中国條數,改向成本較低嘅國家或機構舉債,所以中国債務逐年下降,2019年比2015年減少咗百分之二十六。中国喺緬甸嘅直接投資亦急劇減少,但假如計埋香港條數,則同星加坡叮噹馬頭。

緬甸係一個多民族國家,政府承認嘅民族就有135個,各民族一直你打我我打你。英治時期,驍勇善戰嘅克倫族同撣族(即傣族)及其他民族聯手,打到佔多數嘅緬族無還手之力,大緬族主義(類似中华民族)開始萌芽,引發之後各民族間更多嘅軍事衝突。今日嘅緬甸軍方,對呢種形勢仍然老鼠拉龜,主要原因係部份民族盤踞嘅山地,往往係翡翠同各種玉石嘅主要產地,另一方面,中国一直提供武器畀緬甸民族地方武力(民地武),例如2019年,緬甸軍方就曾高調表達對中国嘅不滿,公開展示喺德昂民族解放軍(TNLA)搜獲嘅大量中国制武器(5)。

圖:TNLA喺撣邦同中国邊境嘅大概活動範圍(紅線)

中共喉舌一直吹噓「圍棋」戰略思維,建立三隻活眼突破美國「島鏈戰略」,包括緬甸「皎漂港」,泰國「克拉運河」、同唔知喺邊嘅巴基斯坦「瓜達爾港」。後面兩隻眼當奇行種笑下就算,唯獨皎漂一出就係孟加拉灣深水區,極適合做海軍基地,假如中国可控制緬甸,即刻鯉躍龍門,海闊天空,因此中国一直用盡方法令緬甸成為另一附庸。但緬甸軍方亦唔係傻仔,始終同中共若即若離,睇上面嘅經濟分析,同埋佢哋對中国供應武器畀民地武嘅反應就可見一斑,加上緬甸人普遍抗拒中共,就算俾中共覇到皎漂港來用,亦隨時會被緬甸游擊隊炸沉。

緬甸國內及中美等關係錯綜複雜,相生相剋,緬甸政變的確為中共創造咗又贏嘅機會,對爱国但無資格爱党嘅人,或忠誠廢物來講實在係喜訊。

(待續)

注:

(1) 丁韙良因譴責義和團屠殺清教民及外國傳教士而得罪慈禧,被慈禧封殺棄用,死後一直被中国人抹黑誹謗。

(2) 《美國「印太戰略」的機遇與挑戰 -兼論對臺灣影響》,謝志淵,中華民國海軍,2018,
https://navy.mnd.gov.tw/Files/Paper/5-%E7%BE%8E%E5%9C%8B%E5%8D%B0%E5%A4%AA%E6%88%B0%E7%95%A5.pdf

(3) 謝志淵,2018

(4)《中國支持緬甸軍方政變?羅興亞難民慶幸翁山蘇姬被捕?緬甸的問題沒這麼簡單》,劉忠恩,緬甸時報Myanmar Times,2021,
https://www.thenewslens.com/amparticle/147065

(5)《中國支援民族地方武力 緬甸軍方強烈不滿》 ,梁東屏,亞洲週刊,2019,https://www.yzzk.com/article/details/%E4%BA%9E%E6%B4%B2%E7%84%A6%E9%BB%9E/2019-50/1576119973334/%E4%B8%AD%E5%9C%8B%E6%94%AF%E6%8F%B4%E6%B0%91%E6%97%8F%E5%9C%B0%E6%96%B9%E6%AD%A6%E5%8A%9B%E3%80%80%E7%B7%AC%E7%94%B8%E8%BB%8D%E6%96%B9%E5%BC%B7%E7%83%88%E4%B8%8D%E6%BB%BF


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments