略論美國兩份戰略文件及印太局勢(下)(文:飛燕草)

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

《美國印太戰略框架》

前文分析可以睇到,「得緬甸,得印太」,緬甸喺美中爭覇入面嘅戰略地位舉足輕重,延伸第一島鏈到印度洋,繼續圍堵中国,成為美國必然選擇。《框架》入面,亦非常露骨噉話要招攬印度,全方位協助印度崛起,令印度成為區內一個志同道合嘅大國,有能力抗衡中国,同埋承擔起保衛印度洋嘅責任。《框架》亦定下一系列操作,例如自由貿易、軍事合作、注入科技等,令印太地區國家慢慢「一體化」,演變成以日本為首、類似歐盟嘅鬆散聯邦。只要回顧中国過去幾十年嘅發展,就可以肯定「印太聯盟」並非痴人說夢。

要特別指出,《框架》完全無講過要推翻任何政權,呢份文件只設定咗對中国嘅防禦戰略,而第一島鏈就係紅線,只要中国觸動紅線,美國就會採取行動,包括保衛第一島鏈上嘅盟友,例如台灣。另一點係,《框架》內所指嘅「盟國和伙伴關係」,講緊嘅主要係印太區內嘅日、澳、印、東南亞及區內嘅其他島國。第三係文件中有提到,喺有利美國嘅情況下,同中国進行合作。第四就係《框架》假設咗俄羅斯只會係邊緣參與者,但呢個假設明顯唔符合現實,例如印度就係俄羅斯武器嘅最大買家,又例如印度同中国喺西藏嘅邊界衝突,每次都要俄羅斯介入調解。

今日嘅戰爭再唔係打擂台,唔會再係硬橋硬馬你一拳我一腳,打贏都會好似英國噉內傷,更何況更多時候會好似韓戰越戰噉打和(對美國來講其實係打輸),或好似伊拉克噉泥足深陷。今日打嘅全部係超限戰,而真正嘅戰場係資訊戰。《框架》內喺呢方面嘅工作包括:

  1. 發展強大嘅公共外交能力,抗衡中国大外宣,拆穿「中国嘅統治係無法避免」嘅論述
  2. 令各國留意到中国「一帶一路」嘅附加條件,及令「中国嘅工業政策及不公平嘅貿易做法正破壞全球貿易體系」成為全世界共識
  3. 喺整個印太地區(包括中国)宣揚普世價值、公民意識
    1. 發展公共及私人資訊機構,向所有國家宣傳自由民主嘅好處,包括經濟、社會福利、科技發展
    2. 同志同道合嘅拍檔協同努力,保護同促進國際公認嘅權利同自由
    3. 接觸包括韓國、台灣、蒙古、日本等民主拍檔,展示佢哋自己嘅成功同所獲得的利益
    4. 支持整個地區嘅積極分子同改革者
    5. 為嗰啲尋求改革嘅國家提供發展、技術同法律援助
  4. 保持對中國嘅情報優勢,令美國同佢嘅盟友拍檔防範中國嘅情報活動
    1. 向美國嘅盟友拍檔提供裝備,合作對抗、打擊中国喺印太區內嘅秘密活動
    2. 強化公共同私營部門嘅反情報職能
    3. 令區內國家更了解中国嘅意圖同能力
  5. 喺印太地區推廣一體化經濟發展模式,提供替代「一帶一路」嘅可靠方案

畫公仔畫出腸,美國喺《框架》中嘅角色,只係安全顧問同軍火商;資訊戰同自由貿易嘅關鍵,係傳遞價值觀同建立本國人民對自由、對故土嘅信念。當爆發戰爭時,美國以九天之上嘅資訊科技,統領各國保衛國土,到最後,仍然需要本國人民負起自己嘅責任,為信念戰鬥同犧牲。

 

《國家安全戰略中期指導方針》

現任美國總統拜登喺三月初公佈嘅呢份文件(下面簡稱《方針》),認為中俄兩國同時對美國安全構成威脅;而將環保同防疫工作寫入《方針》,肯定係「國家安全」同「戰略」嘅新概念。

《方針》中數十次提到要建立「拍檔關係」(partnership) 去抗衡中俄。所謂拍檔,已由《框架》嘅印太區國家,擴充到全世界志同道合嘅國家,包括英國、歐盟、加拿大等。喺《方針》入面,除咗保衛以色列安全,美國所有行動都要拉埋拍檔一齊做,同《框架》由上而下、運籌帷握嘅主導角色,形成鮮明對比。由美軍二月空襲敍利亞,可以睇到美國已經開始實行《方針》,香港亦越來越多評論員指出美國軍力擺咗去中東。可能你會認為美國縮骨(按:都唔係第一次),但引用美國國防部最近一篇文章[1],或者可以解釋拜登點解會作出呢個改變:

「美國印太指揮權覆蓋半個地球。全球百份之六十嘅人口喺呢個區域生活、美國同中国係世界最大嘅經濟體、最多士兵、最龐大嘅海軍、最長距離、最危險嘅區域…… 仲有好多好多。」

另外,《方針》亦為美國出兵設限:

  • 只會係最後手段
  • 應該有明確同可達到嘅目標及使命
  • 兵力相當同有適當資源,及係整體戰略嘅一部份
  • 同美國嘅價值及法律相符
  • 得到全美國人嘅同意

 

總結
小弟故意留白。我已舖平畫紙,期待所有香港人一齊畫出不朽巨著。

 

注:

[1]DOD Officials Describe Conditions in Indo-Pacific”, Jim Garamone, Department of Defense, 3/2021

 

略論美國兩份戰略文件及印太局勢(上):

https://www.localpresshk.com/2021/03/indo-pacific-strategy/

 


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments