香港人移民台灣到底有啲咩壞處呢?睇車呀!(文:Stan Claketon)

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

好多人知我喺台灣住咗超過20年,話覺得香港越嚟越唔掂,佢哋都想移民台灣,所以走嚟問我台灣到底好唔好。

如果同香港比較起上嚟,網上同電視有好多旅遊節目,幾乎已經將台灣嘅優點講曬咁濟,所以優點我就唔講喇,你哋有興趣就自己發掘啦。

我反而覺得有需要提供一啲我認為係缺點嘅嘢;畀香港想移民嘅朋友喺行動之前參考下。

※ 有啲嘢係移民顧問同埋啲旅遊節目都唔會講嘅,就係台灣嘅治安整體嚟講比起香港差好多。因為台灣四面環海,海岸線超級長,所以走私猖獗,尤其是係軍火走私,簡直係達到氾濫嘅程度。

而且台灣男人只要唔係白痴、殘障,基本上全部當過兵,人人識得用軍火,所以如果犯起案上嚟,暴力級數比香港嚴重好多倍。

至於台灣嘅治安有幾唔掂,咁就麻煩你自己裝返個衛星天線,每一晚睇下臺灣當地嘅新聞報道,你唔需要每晚睇,你隔晚睇就得㗎喇!

※ 正如前面第一點所講,台灣幾乎係男人都需要當兵,雖然而家已經改咗由徵兵制變成募兵制,但係世事難料,萬一未來臺海兩岸真係發生軍事衝突,總統有權宣布國家進入緊急狀態,國防部隨時可以發佈全國動員令,到時目前呢個入伍政策會唔會即時變返必須徵兵就真係無人敢包啦。
當兵唔係講笑,入伍之前都要簽好生死狀;將自己條命交畀國家。
先唔好講打仗,就係平時訓練,都會隨時搞出人命,有興趣嘅,自己搜尋下平均每年部隊入面會死幾多人吖。
當然,如果你自問鍾意當兵上戰場打仗嘅,咁當然冇所謂,但如果你頂唔順當兵嘅團體生活,咁我就建議你要考慮清楚先好。

※ 台灣同香港嘅地理位置好唔同,台灣位處環太平洋地震帶,每年大大小小嘅有感地震就起碼十次八次。
我唔知係黑仔定係點,台灣歷史上最大嗰兩次地震我都碰上了,我親歷其境嘅感覺,簡直就係地動山搖,嗰兩次地震合共死咗五千幾人,幾千棟大樓同埋房屋倒塌。
至於幾時會再發生呢啲咁大型嘅地震?我諗上帝都話唔到畀你聽!

※ 台灣同香港稅制有好大分別,最明顯嘅就係台灣有銷售稅,總之你落街買個麵包買支汽水都要畀稅。尤其是牽涉到要入口嘅外國貨,例如名牌奢侈品呀,進口歐洲車美國車呀,稅就更加貴。

※ 相比起香港,台灣嘅平均工資比香港低好多,一個冇工作經驗嘅大學畢業生嘅薪水隨時只係得六千蚊港紙,但係物價就只係比香港平少少。

如果你本來喺香港就打緊風流工;高薪厚祿嘅,越高嘅職位差距就越大,你去到台灣就算做番同類型嘅工作,嗰份少好多嘅薪水一定會令你好有失落感。
如果你唔係諗住自己做老闆;要靠打工養活自己嘅,呢樣嘢一定要三思。

※ 至於飲食習慣嘅問題,我相信應該都好容易適應,問題唔大。
但如果你選擇落腳嘅地點喺中南部;咁你就要注意啦。
因為嗰度嘅水質係硬水〈香港係軟水〉,自來水可以要嚟沖涼、洗頭、洗衫、洗車,但最好唔好直接飲,就算煲滾咗都唔得㗎,飲得多會有腎結石。
自己屋企當然就一定要裝濾水器啦,但出邊嗰啲餐廳店舖會唔會裝濾水器呢?咁就好難講啦,你出去食嘢嗰陣時就自求多福啦。

※ 台灣目前只有幾個大都市有所謂捷運系統;亦即係地鐵。
其他冇地鐵嘅城市,交通真係不敢恭維,你住落你就知。
另一個有關交通嘅問題就係;相比香港,臺灣人無論駕駛者又好,行人又好,道路使用上嘅守法意識真係比較薄弱,嚴重交通事故比率真係比香港高好多。而且臺灣行車方向同香港剛剛相反,香港人真係要多加注意。

※ 香港政治光譜有黃藍之分,台灣都有藍、綠、橘、紅之分。
台灣能夠成為一個民主國家,真係多得台灣人對於政治嘅熱情參與。

台灣人已經經歷過多次總統選舉洗禮,嗰種全民民主意識同埋熱情;完全係一般香港人好難想像。

咁你話好似臺灣咁樣嘅民主制度好唔好呢?
講真,本人真係覺得兩睇,唔好講乜嘢,淨係講每年嘅選舉,就已經煩到你嘔。

咁台灣有啲咩選舉呀?
選鄰長啦,選里長啦,選區長啦,選市議員啦,選市長啦,選立法委員啦,選總統啦……周而復始。

一般嚟講,臺灣每種選舉嘅宣傳期為60日,喺宣傳期入面,真係會嘈到你死。一到選舉嘅宣傳期,各個候選人嗰啲宣傳車每日不間斷咁輪流喺你屋企周圍疲勞轟炸,講真,每次喺選舉期間,我真係有想死嘅感覺。
當然,每個人喜好唔一樣,如果你話你好鍾意呢一種民主嘅生活,你唔怕嘈又唔怕煩,咁又有可能會覺得過癮。

※ 以下呢點女仔就要注意啦,樣貌身材呢啲嘢就各花入各眼啦,唔講呢啲,我淨係講個台灣妹普遍嘅性情就的確係比香港女仔溫柔,講話一般都比香港嘅女仔輕聲細語。

坦白講,我覺得啲台灣妹係扮嘅。
點解啲台灣妹鍾意扮溫柔扮嗲?
咪因為啲台灣佬鍾意囉!
我敬告各位港女,如果你仲係都要保持返喺香港嗰陣時咁嘅狀態喺台灣待人接物, 咁你喺兩性市場嘅競爭力就起碼會少咗三成。
更何況台灣同香港啱啱相反;台灣係女多男少嘅社會,咁你自己諗下啦。
如果你目前嘅男友或老公係香港人,咁你就仲有一點雖要擔心嘅係~
就我自己親身經歷及身邊眾多港仔朋友經驗所得,港仔一旦遇上台灣妹;無論當初如何口硬,最後沉船比率係100%。如果你自問防守能力麻麻,你真係要考慮清楚先好,我嘅貼士只能畀咁多喇。

最後,如果大家仲有咩問題,歡迎隨時留言,我可能夠同你分享嘅,我一定如實奉告。大家都係香港人,千祈唔使客氣!


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments