產業空心化只係偽命題,人口過剩先係真病根(文:Yuk Sing Kwan)

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

pic via screen capture

有唔少朋友話,香港唔搞科研,去咗搞金融呢啲虛火,可見啲仆街金融佬目光淺窄,宜家抵香港俾深圳拋離喇桀桀桀。

佢地咁講,完全係體現咗香港教育制度嘅落後程度,搞到教出嚟嘅人,縱使響第一世界生活,心態上都落後如第三世界。

冇仆街金融佬搭棚,你班科研毒撚屎都冇得食

有人話:戰爭係推動人類科技發展嘅最大助力,呢句說話其實就只係啱一半。 戰爭有助科技發展嘅唯一原因,就係佢令到新發明跳過市場經濟,直接透過領導命令普及化。

科技發展之中,發明故之然重要,但係將發明推而廣之,予以普及化其實先係最重要 (姑勿論俾錢養住班發明家嘅金主)。 咁而家呢個時代,點樣令科技普及化呀?就係將你啲發明變成商業概念,呃第一個老襯落搭,然後再錢滾錢囉。 咁嗰啲係咩人呀?就係為你搭棚嘅maketing姐姐同幫你搭棚嘅仆街金融佬囉。

香港政策向金融傾斜,只係將風險卸俾深圳

好喇,大家成日屌香港金融坐大,冇人做實業。咁我又要問一句,點解香港要紓尊降貴做實業?今時今日,除咗啲咩響屋企用食油自己整番梘之外,任何「實業」都係極度依賴金融嚟維持資金流同供應鏈。

農夫今年就買定下年嘅種籽期貨,再為今年作物買保險。 礦產就直情係以子公司業務作抵押向銀行借錢買礦權。 製造業就更加唔駛講,你有冇見過一個廠佬唔係爭緊銀行錢?

科研本身風險極高,除咗研發時間overrun或者出嚟嘅野唔用得之外,市場反應根本就係個unknown。 相反,香港貴為國際金融中心,你蝕都係蝕街外錢,cap都係cap過路費,何樂而不為?再者,點解做緊幾十億生意,要走去做幾千萬實業?

產業空心化只係偽命題,人口過剩先係真病根

任何城邦帝國發展到一定程度,就要面對一個樽頸位:維繫城市命脈嘅行業飽和,多餘人口必須迫遷至腹地務農,或者乾脆武力擴張殖民。 由於香港主權存在爭議,一國兩制又太多灰色地帶,所以就卡咗響呢個樽頸位。

董建華當年提倡產業空心化,正正就好似宜家林鄭話年輕人上街係因為買唔到樓咁,係用經濟偽命題掩飾香港本質上嘅政治問題,欲蓋彌彰。 時至今日,技術官員重提香港再工業化,除咗係搏存在感,justify自己返六位數人工外,就係要維持呢個醜惡嘅大話。

我份人就好厚道嘅,俾藉口自己唔緊要呀,最緊要唔好笨柒到當係真正原因丫嘛。

(獲作者授權轉載)


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments