光復香港,時代革命(文:散彈一號)

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

pic via screen capture

隨著香港特區政府強力打壓示威者,七月以嚟抗爭行動升級,五大訴求已經逐漸喺前線消失。隨之而嚟嘅,係「光復香港,時代革命」(林鄭語)。

好多人擔心咁樣會令抗爭運動「失焦」,因為「光復香港,時代革命」呢八隻字本身係梁天琦2016年嘅選舉口號,看似空泛,無人可解。

但其實係咪真係咁空泛呢?我又唔覺。自 2014 年以嚟,「非建制」各派喺抗爭時不忘各自互屌,但屌到今日,卻(大致)能夠「不割蓆、不譴責、不篤灰」咁將矛頭直指政府。你固然可以話係林鄭「we connect」咗各陣營,但群眾持續叫「光復香港,時代革命」口號,佢哋想當然係對呢句說話嘅解讀有一定嘅共識。

利申我從來唔係勇武派嚟,我最叻係龜縮喺安全地方寫文鳩噏。不過,請姑且容許我講下我對呢八字真言嘅理解,睇下大家認唔認同,或者有冇補充:

【光復香港】

現下香港嘅執政者只為少數特權階級服務,只識得向中共責負,而唔係為廣大香港人著想。所謂「光復香港」,係指要推倒呢個漠視人民嘅政府,建立一個真正為香港人服務、真正以香港人為先嘅政府。

【時代革命】

為咗達到「光復香港」嘅目標,抗爭者必須抛棄不必要嘅枷鎖,捨棄冇用嘅教條,發揮最大嘅想像力,用盡所有方法。「時代革命」就係指拋棄冇用嘅舊思維,用大家嘅想像力,去創造新嘅時代。「革命」唔一定代表暴力,而係政治制度、政治理念嘅重大轉變。

【寫好份 proposal 未?】

至於究竟點樣先至可以建立一個真正為香港人服務嘅政府,呢個問題,喺香港人未奪回權力之前,只不過係紙上談兵。我覺得,只要以《光復香港,時代革命》為共同目標,喺現有嘅垃圾特區政府手上奪回權力之前,唔需有齊晒proposal先去嘗試奪權。革命時期社會形勢只會迅速改變,必須要有「be water」嘅心理準備,有「摸著石頭過河」嘅準備。有朝一日成功奪權,嗰陣香港變成咩樣,根本冇人可以預料,而家講細節,到時一定變咗廢話。

【亂世箴言】

至於香港以後點算,我只有一句贈言:#愛鄰如己。(利申呢句說話出自《聖經》,但我唔信教嘅) 喺政局動蕩嘅時候,我哋既冇正當政府,又冇所謂「香港民族」嘅清晰分界,人人掙扎求全,點樣避免「war of every man against every man」嘅世界?面對重大決定,又如何決擇?我覺得 #愛鄰如己 嘅精神,可以幫助大家尋找到答案。

— 下面係黨八股,只供愛國愛黨人士閱讀 —

由於 #首先我反對港獨,我必須重申,「光復香港」係要求香港政府以香港人為先,唔係事必要反對中國,唔係事必要搞港獨。只要中國唔好強求香港政府將「國家利益」凌駕於香港人民嘅利益,而係同香港人民認真商討,唔好煽動中港人民對立,咁中國同香港冇根本嘅利益矛盾。

但如果中國連「香港政府以香港人為先」咁基本嘅要求都當成「港獨」,咁好遺憾,抗爭者就唯有搞「港獨」喇。不過關於呢一點,我想引述毛主席《關於正確處理人民內部矛盾的問題》嘅文章:

// 我們的人民政府是真正代表人民利益的政府,是為人民服務的政府,但是它同人民群眾之間也有一定的矛盾。這種矛盾包括國家利益、集體利益同個人利益之間的矛盾,民主同集中的矛盾,領導同被領導之間的矛盾,國家機關某些工作人員的官僚主義作風同群眾之間的矛盾。這種矛盾也是人民內部的一個矛盾。一般說來,人民內部的矛盾,是在人民利益根本一致的基礎上的矛盾。 //

「港獨」唔係香港人諗出嚟嘅,而係有人將「人民內部矛盾」當咗做「敵我矛盾」咁打,迫出嚟嘅社會現像。引多一句毛主席嘅說話: // 社會主義國家內部的反動派同帝國主義者互相勾結,利用人民內部的矛盾,挑撥離間,興風作浪,企圖實現他們的陰謀。 //

真正愛國愛黨嘅人,係唔會將香港人民變成中國嘅敵人嘅。聽好了,任何破壞國家民族團結、煽動種族仇恨嘅,都會係歷史罪人,#後果自負。


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments