得港豬得天下(文:Sidney Fong)

Share This:
  •  
  • 1
  •  
  •  
  •  
  •  
  •  
  •  
  •  
  •  
  •  
  •  
  •  
  •  

~又講下啲阿媽係女人嘅嘢~

香港人出名易管治,要得罪香港人其實唔容易。香港好多「港豬」,唔關心政治嘅。所以就算出面打到拆天,只要你俾個方法佢哋遠離政治、遠離衝突,佢哋就會安心繼續自己嘅生活。

林鄭「送中」衰乜?就係衰在嚇親啲「港豬」。「送中」草案只要通過,所有香港人都有機會體驗「陽光司法」,「港豬」感到安全受威脅,所以政府硬推草案激起咁大嘅民憤。

721 元朗白衫黑打人,點解引起咁大迴響,全城討伐?又係衰在嚇親「港豬」。對「港豬」而言,「暴力」唔係問題,只要唔好打到我就 OK。警察打示威者冇問題,因為佢哋唔會去示威。示威者打差佬都冇問題,因為佢哋唔係警察。但 721 當晚,白衫黑 *無差別* 攻擊途人,咁就唔同喇。「容乜易打到我架?!」 佢哋會咁諗。所以,「港豬」被迫出聲,最後全城討伐。

一個政治勢力,得到「港豬」支持固然係好,但最緊要嘅,仍然係唔好迫到「港豬」入絕路。林鄭迫到「港豬」反送中,政治能量一朝喪;白衫黑社會迫到「港豬」反黑勢力,支持佢哋嘅何君堯,議辦祖墳被破壞,大家仲會大聲讚好。所以無論你政治勢力表面上有幾犀利都好,只要得罪一眾「港豬」,迫到佢哋要反抗你,你最後都係冇運行。

香港嘅局勢越嚟越唔穩定,示威行動衍生嘅暴力亦都不斷升級。有時暴力係可以達到某啲目的嘅,但無論你咩勢力都好,都要必須記住,無論你有幾多資源、有幾多人馬、後台有幾勁,只要力量運用失當,嚇驚或得罪咗港豬,佢哋有幾百萬人,你下場一樣會非常慘淡。

而家政府連番失誤,回天乏力,抗爭者喺輿論上似乎稍佔上風。但繼續落去,抗爭勢都要記住唔好以為形勢大好就輕忽,喺抗爭嘅行動中搞到「港豬」。萬一佢覺得自身利益或安全受威脅,覺得巧驚驚,「民意」就可以一夜之間驟變,到時咪話你拉倒建制勢力,你自身都難保。望下林鄭、何君堯,曾經喺權力嘅㒹峰忽然變成過街老鼠。抗爭者冇「阿爺」撐,行動要有「正當性」就一定要取信於「民」。「民」係咩嚟? 咪就係「港豬」囉。

大家加油~

—-
PS: 以前啲「和理非教條主義」撚成日話「一旦發生暴力就會失去民意支持」,點解六月至今行動不斷升級都冇問題呢? 一來林鄭做得非常「好」,幫大家提供咗反政府嘅理由;二來都係「五大訴求」深入民心,一般「港豬」都知道抗爭者只係爭取呢幾樣嘢,矛頭係指向政府而唔係 *無差別* 發起暴力。所以如果抗爭太過偏離「五大訴求」而又冇清晰嘅行動宗旨,啲「港豬」就有可能開始驚驚豬。要避免「港豬」驚驚,行動之前要有充足嘅文宣,確定「港豬」明白行動嘅目的,點樣避開衝突(如有)。呢啲就係林鄭一直講但做唔到嘅「與市民溝通」。只要呢樣嘢做得好,所有行動都無往而不利。


Share This:
  •  
  • 1
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments