時代已經淘汰沈旭暉(文:逆嘶亭)

Share This:
  •  
  • 13
  •  
  •  
  •  
  •  
  •  
  •  
  •  
  •  
  •  
  •  
  •  
  •  

PIC VIA SCREEN CAPTURE

狙擊沈旭暉,狙擊到畀人以為我同佢有私人恩怨,但我只係希望藉住點出代表人物嘅問題,去解構香港中產精英崇拜嘅思想,以及引出香港缺乏貴族對抗暴政嘅原因。

香港一直以黎,都有所謂精英衝出黎以中間路線自居,而沈旭暉篇蘋果訪問標題,正係「悲劇後 再無中間派」。於我而言,中間路線可以有好多定義,但因恐共親共而進退失據,並非其一。沈旭暉認為,自己嘅角色係傳統精英,因此有能力喺「關鍵時刻一錘定音」係佢最大價值,因此佢一直唔會參選或者做行會,而「不時要做一些主旋律行為儲血,留待扣血所用,很累」係佢嘅感受,種種言論,其實都係為求自保。

首先,我認為真正精英嘅責任,係為亂世殺出血路,揭穿暴政真貌,對抗強權。為政權延續生命同拉攏民心嘅,好聽係殖民地精英,難聽就直頭係原則不清嘅走狗。沈旭暉話自己「致力令體制內的離地者知道外界發生甚麼事」,但點樣令體制中人接觸民意,係大學本科政治1001就教嘅嘢,佢冇理由唔知。香港真正需要嘅,係重奪主權,迫令政府還政於民,因為只有體制健全,離地者至會腳踏實地。呢個目標,至係精英應該努力嘅目標,而好多出身一般如我嘅人,都正為呢個目標而一直耕耘。

沈旭暉自己本身就係離地者,但佢完全意識唔到。本身就離地嘅人,不論佢付出幾多,結果都只會係令一眾離地者更加圍爐,造成反效果。沈旭暉成日話自己已經好畀心機,講到自己已經出盡奶力去推廣國際關係同關心香港,但一個人唔知道自己長處短處,係唔會真正幫到其他人。佢自己嘅短處,正正就係離地,而唔知自己越做越錯,最終就令一眾以佢馬首是瞻嘅人更加離地,然後跟住佢打完飛機就轉跑道,自我感覺良好。

其次,真正精英,係要洞悉世界秩序,協助自由民主思潮散播。去完美國留學,但竟然運用所謂國際關係理論去為中共殖民統治塗脂抹粉,就係讀書讀唔通,一切都係白讀。香港嘅最大價值係國際身分,正確,香港可以有bargaining power,正確,可以為中國提供服務,亦都正確,但點解沈旭暉要幫中共爭取一個幫手逐步開放嘅城市,而唔係由香港人角度出發,建議香港點樣成為東南亞經貿小國,進而同新加坡再爭一日之長短?「只要大家看見我們相信的價值觀、生活模式都有更厚的防火牆,減少不必要的接觸,中港矛盾就不會現在這樣」,造成今日矛盾嘅係對方,佢竟然要求香港盲目相信落去?「相敬如賓不是更好麽,但政府不懂,拿不到更多資源,又無勇氣講數,結果又是加深矛盾。」自由係捍衛自身利益嘅基本,香港自由不停收窄,佢竟然天真到叫大家相敬如賓?耶魯又好,牛津又好,所有學院都因沈旭暉而格調盡失。

最後,香港就係因為呢啲人而產出唔到貴族,但當然,呢個係結構性問題,沈旭暉死罪可免。九七之後,香港公民社會假象已經逐漸破滅,社會信心崩潰,其實完全唔係壞事,因為只有經歷絕望,至會有希望。然而,沈旭暉參與政治,並非因為伸張正義,爭取自由,而係為咗尋求社會認同,為自己貼金,如此出發點,又點會為自己下一代同香港下一代注入道德勇氣去開創新世界?貴族體系由專門嘅知識分子同政商人士支撐而成,佢地因為守護祖上志業而熱心公益,投身社會,但貴族嘅第一代並唔係含住金鎖匙出世,貴族家庭係由有遠見有理想嘅一代人建立。香港嘅所謂精英,只係依附中共嘅中產富人,共產黨打到黎,隨時自己身家性命財產都保唔住,只可以跪地求饒,自然缺乏貴族氣質。

試想像沈旭暉之流學成歸來,善用手上人脈資源(佢聲稱自己有),全力支持香港獨立,然後佢嘅下一代,就自然成為同香港利益共生嘅人,同時亦為傳承祖上理想而努力,咁三代過後,豈會不成貴族?香港立國之後,將有貴族冒起,而今日醒悟到自由為何物嘅人,即使再窮都好,讀書再少都好,都係為緊下一代成為真正精英而出錢出力,無論如何,都勝過沈旭暉。

今日過後,我唔會再寫沈旭暉,因為推廣完大灣區再移民去葡萄牙嘅人,已經好難係我地嘅同路人。香港已經拋棄沈旭暉,所以佢話,「就算失敗,at least we’ve tried ok?至於the day after tomorrow,到時再說吧」,極之消極。的而且確,香港已經唔再需要沈旭暉,而沈旭暉可以做嘅,就係趁未獻醜人前,自己先行拋棄香港。明明係為時勢所淘汰,但又講到係自己要移民,呢種姿態,again,不愧為所謂精英沈旭暉。


Share This:
  •  
  • 13
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments