被上門拘捕時,心理經驗分享(文:黃永志)

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

本報圖片

作者按:

如果下文太長,我覺得最重要係:
我當時係***總之抱持著一種坦然「終於到我啦」,幫自己定下驚先***
同埋:***驚是正常,但要尋找機會將你被捕的消息講比人知,voice message 比朋友都得***
執生send message話比人知,及自己影相留證據。

全文:

這幾星期一定好多人被捕,因為我曾都被捕過4次,其中2次是上門被捕,所以想分享一下以前上門被捕,在心理上大概係乜野情況。

================
【一、早上睡夢中被黑警拍打嘈醒,一定好驚】

我兩次被上門拉,都是早上7點拉人,警察瘋狂拍門嘈醒,你未瞓醒所以一定會不知所措,亦會好驚。(而且好燥,點解我4點先瞓,7點就嘈醒我!)

**但都要抱持著一種坦然「終於到我啦」,幫自己定下驚先**

黑警點解要咁早?一來係因為佢想搞埋你屋企人,令你屋企人都驚,二來佢都驚你地之後要返學返工,三來就係當你未起身,腦都未諗到嘢嘅時候,係你最軟弱沒有精神和意志嘅時候搞你,令你反抗唔到。

但由於那次我的行動是反對立法會替補機制的諮詢會場衝突行動, 當時有很大的社會反響,所以我心入面一直都估計一兩星期內,警察可能會上門拉人,我當時已有少少心理準備。而同一一早上有另外五人被捕,包括長毛/及其他社運朋友。(我估今次都應該會係幾星期內瘋狂早上拘捕)
==================
【二、警察一定大呼大喝,想你完全屈服,聽哂佢話】

佢當時首先係大聲呼喝,叫你即時開門,而且惡形惡相,務求讓你及家人都屈從於警方的意志。我當時由於已準備公民抗命,所以開門都無乜所謂。

但係,我事後諗返其實唔洗咁快開門,可以等一等飲杯水,洗個面,打個電話或message,令自己清醒一下先。如果佢知你有經驗去應付,你又夠鎮定,可能佢就無咁得得寸進尺。
==================
【三、極重要:驚是正常,但要尋找機會將你被捕的消息講比人知,voice message比朋友都得】

由於係上門被捕,所以我要求在房入面換件衫,及刷牙梳洗後才跟黑警走。警察當時係唔俾我鎖門換衫,只俾我半開門咁換衫,可能因為怕我爬牆逃走又或怕我者通知其他人。

****我當時仍在嚇醒的狀態中,但我換衫的時候把握機會,用手機send了個message給其他社運朋友。警察見到即刻上叫我停止send message以及想沒收我電話,我當然死都send左先,唔理得咁多。send完就繼續著衫。****

因為我的朋友知道我被捕,一定會安排律師來警署。所以即使我唔記得任何律師的電話,我仍知道自己被捕後係會有人來幫我,所以感覺安全。

如果唔得閒打message,錄個voice message都得。簡單message即可,就咁(例如我當時係打:我現被上門拉,被帶去警署)。

今時今日,佢一定係會想收左你電話先,所以我建議最好未開門比佢入時,就應該send 個message 比朋友。同埋大家一定知道,絕對唔洗開機或比pw黑警。

如果我再次被捕,我可能會自己一路在fb拍live,拍埋自己無受傷時的樣,以防到時被黑警打完都查無對證。

你要知道,你的朋友如果知你被捕,肯定會叫人來救你的,唔洗擔心。
=========================
【四、預左要孤獨面對半日,甚至有心理準備可能被黑警打或屈】

黑警拉得你,佢一定會call 哂馬,而且斷你聯繫,令你覺得好無助,係孤軍作戰。過程中,如果你有反抗,可能更會屈你阻差或襲警。所以如果係冇閉路電視或者親人嘅見證情況下,係會有一定程度危險。

我第二次被上門拉時,有屋企人在家中,咁至少有個人叫做下見證,黑警無機會亂來。另外,佢亦會係好多細位令你唔舒服,例如專登在警署開到冷氣好凍,依啲位要硬食,無計。

你係差館當然唔好受, 因為佢一定左chok 右chok, 問你更多料, 問你屋企人做乜, 問你工作係咩, 點解當日去現場之類, 問你識唔識其他人, 但大家都知道,「我無野講」。

你一定要知道, 佢係呃緊你講更多野。但如果佢知道你唔會講野, 知道你有心理準備, 咁佢地都有機會知難而退。

當時自己意志一定好薄弱,但記著, 捱過佢就得架啦

===============
【五、自己一個,真係唔好挑釁警察】

得你一個,就算你講得好有道理都好,佢真係可能會打柒你,因為你冇人證。而且好有可能佢會告返你襲警,佢哋咁多警察一定會互相做人證。所以依啲位無謂作意氣之爭。

===================
【六、不幸被黑警打,係會好x驚,但唔好諗坐住還手或駁嘴】

大家都知我同Jaco、禮等在2014年6月新界東北抗爭中,被拉上警車毆打。由於太突然,我哋都真係成程都反應唔黎,我地當中有數人被打到頭破血流,至今仍歷歷在目。黑警毆打時,佢地係痴左線的,屈你係黑社會,x你老母,總之打你時一定粗口橫飛。

唔洗問,我地一定會好驚。但我知道,我唔會夠佢地打,而且駁斥佢地只令佢地覺得打得更理直氣壯。所以我係唔會回應佢任何屈我嘅野或者鳩問我的問題。(例如佢會成日問我地知唔知錯,你唔係好x威架咩,你唔係好x型架咩)

黑警打人,很可能是沒有第三者見到,而且又沒有閉路電視。上到庭真係各有講各講。所以依個位我地係完全處於下風。

所以,我的原則係,由於已完全肉隨鉆板上,無需要係佢地完全優勢時候硬碰。

只能沉著氣等黑警自己收手。係好難受,但無辦法。
=====================
【七、最好要在差館見律師,離開警署時立即去醫院驗傷】

我地去到警署,我已見到幾個人披頭散髮,血流滿面。就算你知道自己冇犯法,但都已經冇晒氣勢。

黑警又呃有氹,威逼利誘你,等你唔好見律師。黑警同我地講話「你都識啲程序架啦,唔好見律師啦,可以早啲完成程序早啲走」,而且又在拉Jaco去廁所位要求佢洗走血跡,亦暗示佢唔可以見律師,否則會打多獲甘。

有律師雖然當日黎左差館,但我地是沒有見面。無錯,因為係警察威脅下,黑警戚唔比我地見就真係令我地見唔到。但事後想,都係盡可能堅持要見,雖然我知係好難。

好多「被捕須知」都說,正式程序上,如果你被捕,你在警署係會見值日官,並告訴值日官你被打。但以我兩次上門被捕的經驗,其實都唔知邊個係值日官。大家執生,總之原則係盡可能在警署入面就要有第三方來見證你的傷勢。

我亦都建議係離開警署時,在警署內就call白車,以及影低自己傷勢,否則將來告佢都無證據。

========
【八、事後紀錄】

如果你再被捕過程中受到毆打和不公平對待,一定要在事後詳細地紀錄自己被捕過程。(例如我哋個case就係民事告警務處,但至今5年先至上到庭。)

=====
我無野講
我無野講
我無野講
我無野講

喂,依點大家都知,我就唔講了。

最後,記得一定要帶件長袖外套,因為差館冷氣好凍,意志一定大減,保暖好重要。
====


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments