獄中義士來鴻:《孤立本土泛民嘗惡果,美中鬥法香港可重光》(文:Sam哥)

Share This:
  •  
  • 37
  •  
  •  
  •  
  •  
  •  
  •  
  •  
  •  
  •  
  •  
  •  
  •  

本報圖片

親愛的Joel哥:

十二月五日已經收到你的信,只因躲懶及躲冷,遲至今日才覆信,歉甚!

謝謝你及毓民、Anna十二月六日一同探望我,亦收到毓民新近的著作兩本,待空暇時定當拜讀,謝謝!亦感謝Anna盛意拳拳,臨飛返英國都來探望我,知她做人做事都很認真,乜都要做到好,就算打工都要做到加零壹,呢種精神當然值得欣賞,但都要顧下自己身體為要呀!有便請兄代小弟多謝她也!

張兄也在隔個星期後來探望我,他的到來令我驚喜,原本Wing臨去日本旅行前只是安排柴九哥、蕭雲兄二位,點知加多了張兄來探,真是難得。原來他及嘉玲二夫婦在本月底就要移民去加拿大國,令次探唔到就要等他在加國返港渡假才能見到,可惜每次探期只得三位名額,至令他愛妻今次未能同來,可惜。實在多謝各位的隆情厚意!

兄咁多年來為了捍衛香港及幫助一班受打壓的年輕人,除了出錢、出力、時間,仲要受啲匪人騷擾,攪到要向嫂夫人解釋,但兄仍力撐。雖有時難免感到辛苦,相信嫂夫人都是明事理的人,唔會太難為你吧。有幾多個能挺直腰骨。盡見多的是見風駛𢃇醒目仔。做返自己就好。

西九十一月補選,泛民敗選後,伸出橄欖枝,佢哋內部有聲音說要同本土派溝通。人哥今次得票九萬幾,基哥約一萬,合共十萬多啲。同上次西九選舉泛民得票相約。換句話,西九本土派四萬多票真係一票都冇投俾泛民。我唔同意是焦土的作用,而是本土派青年對泛民的失望、放棄。

過去本土派年輕人對香港強權的反抗行動,泛民不但沒有聲援,反而落井下石,跳出來譴責本土派。在元朗三一一反水貨大遊行中,大量年輕人被毆打到頭破血流、被噴胡椒、被無理拘控,本應去譴責施暴的當權者,但泛民的新同盟范國威、人力的慢必、社民連的長毛、社運界的韓連山老師沒有去譴責班暴力執法者,反而第一時間去開記招聯合譴責班捍衛香港利益(大陸水貨客來掃大量日用品、嬰兒奶粉,搞到本港媽媽有錢都買唔到奶粉,日用品都因鋪租而搶貴咗。)

初一魚蛋革命(也因為捍衛本土文化、街頭小食),長毛也第一時間出來譴責這場運動的年輕人。(可笑的是,天琦受審時,我見他有時都到庭一現)涂謹申更加可恥,當第一批受審被判的初一義士受刑三年,他說刑期好合理。我吊高他啦!本土派選出的立法會議員,梁游二人被DQ時,不但沒有聲援,反而說他二人少不更事、低B、抵死,做埋啲嘢俾政府有位入。

大佬呀!以前在議會,毓民、長毛都有做同樣的行為啦,都會咁玩法啦,都冇事,而家政府不依遊戲規則,強行DQ梁游二人議員資格,為己為人,你哋要譴責政府至啱數喎。

其實就算唔係梁游二人,是泛民二人,相信結局一樣。因為強權政府要將非建制中人逐漸減少,以利建制派多數時可做啲違反民意嘅事。陳浩天、陳國強、梁天琦等本土派首先被DQ,然後自決派小麗、姚松炎、羅冠聰被DQ,恐怕以後泛民被DQ的陸續有來。強權政府要打開缺口,逐一DQ哂非建制中人。泛民太目光短淺,以為梁游二人失去的議席會由泛民頂上,所以不單不幫助二人,反而暗暗高興。結果如何?

所以泛民的覺悟也來得太遲了。

本土班年輕人一一看著泛民的所作所為,對他們怎不痛心、失望,又怎能可以像粉筆字抹去呀?他們又憑甚麼得到本土派的票?就算本土派年輕人有啲事做得過火、輕率,誰人在年輕時沒有犯過錯?每個人都可以在錯中吸收教訓,然後積累經驗,以後就做得更好!但你們沒有好好同他們傾下,只有責備、譴責,誰又會服你們呢?唉,但願你們這次檢討不是只為將來想得本土派張票,而是知道點解會失去年輕人的心,認真檢討、肯改下態度,咁就好啦。

睇返世界格局,呢幾個月發生的事,相信對大陸及香港的影響好大,癲佬侵侵同大陸佬玩,大家目光聚焦在貿易戰上,以為侵侵是生意佬,大陸肯在貿易上讓下步,俾啲甜頭他食就可以。冇錯,他是一個生意人,但卻是個精叻的生意人,除了錢外,他也要錢外更重要的國家利益。

DQ中興後入主中興,令中興在美國掌握中,在美國起訴被大陸利用的前香港高官何志平,在加拿大引導華為公主孟晚舟,公告天下起訴大陸兩個駭客,現在喺美國拉左一個大陸人、告佢竊取機密罪,聯合各盟國阻止用華為網絡。調查華為違反美國禁令,偷運違禁品給伊朗。不理大陸強硬警告,派航母及戰艦在南海接近大陸聲稱擁有的島嶼,在附近巡航。加強加大賣武器給台灣,通過「台灣旅行法」,通過「亞洲再保證倡議法案」,簽署「西藏旅行對等法」,等對新疆「再教育營」違反人權,可能也會簽署「新疆旅行對等法」,美國一個國會委員會針對香港一再違反一國兩制,漠視人權、自由,放言可能取消「美港關係法」及取消「香港獨立關稅區」。

若果對以上美國陸續有來的行動,大陸及香港掉以輕心的話,大陸我唔講,香港到時就大鑊啦。香港失掉美國俾的優惠,同大陸的城鎮有甚麼唔同。香港對於大陸有利用價值就是利用呢啲優惠可以輸入美國的高科技及做白手套,若大陸仲唔想失去香港的利用價值,只可以做到令美國滿意,大陸不再用他的影響力干擾香港的民主、自由、人權,若大陸肯咁諗,香港還有得救,相反,香港就變成一個死港,咁就或者置諸死地而後生吧?

對於美國國會考慮取消「美港關係法」,取消「香港獨立關稅區」,亞天、家駒、Tony等人的努力不懈功不可沒也。

區姐一個多月前的信我都未覆呀,死啦,趁此機會向她講聲對不起。區姐信中投訴你呀,上次行飛鵝山時沒有妥善照料呀,成條路都要爆林,山路又多荊棘,搞到手手腳腳都界傷了,又要摸黑在陡峭的高危崖落山,話比起我哋以前行的路甘好多。(難道行雙鹿石澗、南天門、狗牙嶺、蚺蛇尖、青山腹地都冇咁兇險?)講到咁驚嚇,下次出來約你哋行一轉。區姐,你的大作,小弟拜讀了(剛好收到妳信後,又看到練老篇文)同意妳「文化」是沒有回歸這回事,香港跟大陸的文化是兩碼子,我也認同文化獨立與政治獨立是有必然的因果關係,回看九七之前及九七後文化界的變化就瞭然。

區姐也不必太悲觀。大家都唔想做「盧亭」,都想做個命運主宰者。區姐,恕小弟疏懶,覆咗信啦,呵呵。

早幾天收到焯文手繪的聖誕卡,好靚好有意思,也請兄代謝!好了,冇紙寫啦,下次再說。

祝一切安好,新年進步!

弟Sam
24-12-2018

Sam哥書信集

訪問:香港史上首位「暴動罪」耆英——2016年旺角初一夜站在前線的Sam哥

香港史上首位「暴動罪」耆英——2016年旺角初一夜站在前線的Sam哥

 


Share This:
  •  
  • 37
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments