散彈一號:必須大力加強香港人對《基本法》嘅正確理解

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

環觀世界各國嘅憲法,我哋就會發現,所有憲法都會表示「國家權力在人民」、「國家主權在人民」之類嘅概念。我國作為文明進步嘅現代國家,憲法中當然亦有此表述[1]。

但喺香港,《基本法》寫明香港特別行政區嘅主權,以及一切權力來源,在中國 [2]。因為,香港係中華人民共和國不可分割嘅一部份。香港特別行政區嘅權力,係由我國十三億人民共享嘅。

香港同中國嘅關係,或者在古代有啲似「主權國」同「藩屬地」嘅關係,現代社會稱之為「殖民」。不過好在,香港人唔係一個獨立嘅民族,香港人都係中國人,都係中華民族,血濃於水,無分彼此,除非唔係[3]。從來唔會有國家對自己民族進行殖民統治。殖民統治,只不過係歐洲人對其他民族嘅壓迫而已。

雖然香港人係中國人,不過香港人同普通中國人嘅政治權利有好大分別。香港人不得公開加入共產黨,不得加入人民解放軍,亦從來不得以進入如政治局之類嘅政治權力核心。基本上,香港人極難參與中國政治。我哋當然唔可以因此謂香港係中國嘅「二等公民」。《基本法》寫明「中央人民政府所屬各部門、各省、自治區、直轄市均不得干預香港特別行政區根據本法自行管理的事務」,所以呢種關係係雙向嘅,並非單方面壓迫。江澤民主席稱呢種關係為「井水不犯河水,河水不犯井水」[4]。

在「一國兩制,港人治港」嘅方針之下,香港擁有高度自治。雖然香港人冇資格制定國家政策,但香港特區政府確實需要配合國家政策,否則難免影響民生。呢種安排,係為中央政府為香港好,所以香港不得異議。

所以,我哋理解到,在《基本法》之下,任何民選議員挑戰中國主權嘅行為,都係違法違憲嘅。我哋唔可以依靠西方民主理論,話褫奪港獨自決派議員資格,係同香港人民意願相違。香港人在《基本法》之下擁有選舉權,但《基本法》並無授權香港人分裂國家嘅權力。選舉權,只係保證香港人可以依法參與選舉,但香港特別行政區嘅權力來源,仍然在中國。呢一點,係香港人必須正確理解嘅。

香港人未明白香港自古以來係中國不可分割一部份嘅歷史事實,所以搞自決,搞港獨。香港人在英殖治下忘卻家仇國恨,未明白我國領土完整嘅重要性,所以必須加強國民教育,使香港人正確認識《基本法》,認識中國對香港嘅主權,遠遠重要過香港人民嘅意願。

香港人崇尚法治,只要香港人明白「自決」、「港獨」都係違法兼違憲,就一定會改變心意,收回分裂國家嘅念頭,尊重法治精神,做奉公守法嘅良好公民。

香港人在共產黨領導之下,必定可以為我國發展健全社會主義法制,自力更生,艱苦奮鬥,逐步實現工業、農業、國防和科學技術的現代化,推動物質文明、政治文明和精神文明協調發展,把我國建設成為富強、民主、文明的社會主義國家。[5]

—–
[1] 中華人民共和國憲法 第二條:中華人民共和國的一切權力屬於人民 http://www.people.com.cn/BIG5/shehui/1060/2391834.html
[2] 序言:中華人民共和國政府于一九九七年七月一日恢復對香港行使主權;第二條:全國人民代表大會授權香港特別行政區依照本法的規定實行高度自治,享有行政管理權、立法權、獨立的司法權和終審權。 http://big5.gov.cn/gate/big5/www.gov.cn/test/2005-07/29/content_18298.htm
[3] 香港有少數無外國國籍嘅少數族裔
[4] 江澤民 1989 年 http://theory.people.com.cn/BIG5/49157/49163/5851867.html
[5] 中華人民共和國憲法 序言


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments