【學苑授權轉載】香港人自強 前言

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

文/顧博謙

轉眼間到咗 二零一七年,轉眼間香港已經陷共二十年。依二十年係痛苦不堪嘅二十年:中共蠶食香港人嘅自由,港共同商賈以所謂市場邏輯壓榨港人,北國嘅文化入侵令到我哋本嚟熟悉嘅香港越來越陌生。搞咗三十幾年嘅民主運動徹底失敗,香港人卒之開始有獨立嘅呼聲:我哋唔要再受到任何殖民者嘅制肘,我哋要過自主、自立同有尊嚴嘅生活!

今日,社會因為一波又一波嘅抗爭失敗而彌漫住一股低潮,社運、抗爭逐漸沉寂。時間彷彿返返去雨傘革命啱啱完結嘅時候:「原來抗爭都係冇用㗎啦」、「點都唔會有救」、「香港都係玩完」。遲遲都未得到成功令我哋變得垂頭喪氣,一腔朝氣嘅理想主義亦都逐漸墮成犬儒嘅現實主義。

今期《學苑》時政專題「香港人自強」,就係希望喺依個時勢重新強調港人自強嘅必要。<獨派要莊敬自強>一文闡述獨立運動迎嚟嘅重重危機,剖析可能引發革命嘅種種因素,同獨派點樣把握機會成就革命。<支持民主嘅就請同特首「選舉」絕緣>揭穿小圈子選舉本質上同民主原則背道而馳,批評「民主派」參與其中嘅不妥,同時批判利用現行制度「造王」嘅妄想不切實際,重申爭取真正民主嘅目標。<港英其實都只係一舊屎>喺政治方面重新評價港英,拆穿港英嘅偽善,批判香港人一直以來「緬懷港英」、覺得「彭定康為香港爭取民主」嘅迷思,藉此警惕港人拋棄對前宗主國嘅任何幻想。<虛擬嘅自由:當社會解離成為個體>承接今期<苑論>,一語道破香港「虛擬自由主義」嘅危險,描繪港人被剝削嘅真相同困喺自由市場秩序帶嚟嘅危機。當香港人選擇關心個人物質生活幸福,唔再視政治生活做佢生命重要嘅一部分,香港就冇抵抗當權者權力嘅公民社會。新詩四首<德輔道西>、<堅尼地城海旁>、<兆康苑>、<黨之煉金術師>,各自以溫柔或者諷刺嘅語言勾劃出當代香港青年對荒謬時局乃至生命不同種類嘅心境。

要爭取自主、自立同自尊,香港人首先要自強。香港人面對外憂內患,我哋唔可以寄望只為選票嘅政客,或者依賴只為自己政治利益計算嘅前宗主國,更加唔能夠指望殖民者恩賜。解救香港嘅時代責任始終都係喺香港人自己手上。

魯迅講過:「只是向上走,不必聽自暴自棄者流的話。能做事的做事,能發聲的發聲。有一分熱,發一分光,就令螢火一般,也可以在黑暗裡發一點光,不必等候炬火。此後如竟沒有炬火:我便是唯一的光。」我哋唔怕失敗,只怕唔會成功。願我哋都化作光,照亮港人獨立自強嘅道路!

 

獲香港大學刊物《學苑》授權轉載,原文刊於《學苑》二零一七年最終回《香港新文學運動》:《學苑》PDF版本


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments