專訪陳澤滔——因梁天琦出現才敢講港獨

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

chan

陳澤滔,立法會選舉(九龍東)候選人,來自東九龍社區關注組,現為主題公園工程師,自成功「入閘」後仍不時在選舉論壇上表明自己支持港獨。本月廿八日,陳澤滔在觀塘海濱花園接受《本土新聞》獨家訪問,大談當初決定支持港獨的心路歷程、如何受梁天琦影響而敢於談港獨、如果當選後如何實踐獨派理念,也解釋了自己是「溫和派」及不支持「建設民主中國」理論的原因。

訪問、整理:實習記者 顏海楹
攝影:實習記者 顏海楹、羅其軍

較早前,在903節目《政經星期六》中,主持人讀出陳澤滔去年的一篇文章,當中寫著「我唔太支持,但我對港獨唔反感」,質問陳是否在參選立法會前才「忽然港獨」。本報記者就此問陳澤滔有何回應,於是陳也大談自己於今年初決定支持港獨的心路歷程。

因為梁天琦出現才敢於講港獨

陳澤滔憶述,今年初,青年新政聯絡東九龍社區關注組,組成標榜「民族自決」、名為「ALL IN HK」的聯盟。加入後,陳便開始思考在「民族自決」的主張下,香港的出路應為如何,「是歸英/美/台?是組建城邦?還是香港獨立?」

陳表示自己均考慮過各條出路,但對於選擇歸英/美/台,「唔係成日話要人幫,可能人哋(英/美/台)係好過中共,唔會點控制你啲野,但你就永遠都係『揸頸就命』」;而對於組建城邦,他坦言「好老實,我冇睇過國師啲書,但都係嗰個問題,當中共唔肯同你傾時,你去咗城邦,個處境都係一樣。」

「咁最後係揀咗香港獨立?點解?」記者問。

「我支持港獨係因為人大八三一框架,中國根本冇誠意去畀香港人普選,依家仲要踢走啲人唔畀參選啦,如果你相信政制係關係民生嘅時候,咁除咗獨立我哋仲有咩方法呢?」

他也指,中共根本沒有想過在給香港人任何自由,香港整個架構是崩潰的,所以他支持香港獨立。

「咁有冇邊個人或邊件事令你真正決定要支持港獨?」記者續問。

「其實我諗完(支持港獨)都未肯講,咁點解我敢講呢,係因為知道原來有梁天琦呢個人。大家覺得香港獨立呢樣嘢原來唔係剩係得(中出)羊子啊、招顯聰啊,我唔係侮辱佢地,佢地畀人嘅形象係出位啲去宣傳,我贊成,因為少人留意就要make noise,但到有一個真正image既人(梁天琦)去講時,我就夠膽一齊去講。你可以話我係個好懦弱嘅人,但我覺得幾好,有個人跟,唔係啲咩問題。」

chan2

「假如令共產黨唔踢走香港就亡國」

談及獨立,不得不談其可行性及可採取的手段,記者遂問到陳澤滔的想法。陳澤滔的想像是,嘗試透過向中國輸出民主力量,令中國國內民主呼聲四起,繼而使中共不得不把香港踢走。

「因為講個可行性,大家覺得一定要打仗,咁但係我睇到星加坡都唔係因為打仗而獨立,係被人踢走的,我就諗有冇辦法可以令到中共政權踢走香港,我覺得其實有啲可行。假如令共產黨唔踢走香港就亡國或者亡黨,咁就得。」

「咁你覺得香港要做啲咩?」記者追問。

「我嗰時有篇文就係話,你(香港人)要輸出民主力量,令到佢哋建設民主中國,假如香港都搞到好㷫熻熻時,盡量(睇吓)令到中國人會唔會響應。呢個係我當時嘅其中一個想像。」

「咁所以你支持建設民主中國?」記者感到好奇。

「中國冇民主,香港有民主都冇用」

「我支持任何一個國家有民主。」陳回答。

「有人會話中國有民主,香港先會有民主,你點睇?」記者再問。

「假如我認同嘅話,香港先要獨立。因為如果中國冇民主,香港有民主都冇用,可能佢真係會操縱你,去種票啊,搵黑社會搞你啊。所以,香港就係因為咁更加要獨立。」

chan1

如果當選將實踐獨派理念

記者也問到陳澤滔,如果成功當選,將如何在議會內實踐獨派理念?

「啲人成日話香港冇水冇糧,要解決咗呢樣先。」

陳指,將提議在港加建海水化淡廠,也會主張復興本土農業,漸漸令到香港能夠成為一個自給自足及不用過份依賴中國的地方。

陳澤滔為立法會選舉(九龍東)候選人,同區其餘候選人名單排首位的包括黃國健、胡穗珊、高達斌、譚香文、謝偉俊、柯創盛、呂永基、胡志偉、譚文豪、黃洋達、譚得志。


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments