曾焯文《粵辭正典》之當堂嚇一跳 然後得啖笑

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

曾焯文《粵辭正典》之當堂嚇一跳 然後得啖笑

(圖片來源:Whatscap網站)

dong1tong4當堂。原解大堂上,後解審案公堂上,再引伸為當場、即刻。

〔例〕二零一六年七月廿六日《蘋果日報》<Pika Pika Pokémon GO殺到 全城捉精靈>影片謄本:二零一六年七月廿五日,晴,十一點幾起身,碌碌下FACEBOOK,見到呢個POST,我當堂嚇一跳,即刻上GOOGLE-PLAY,想捉實潮流嘅尖端,會一會我隻比卡超,Pika Pi Pi Pi Pika。


〔例〕王晶(一九九零)編劇《賭俠》(王晶導演,周星馳、劉德華、吳孟達、向華強、張敏主演)周星馳:昨日,我菲律賓工人行過街市,聽到有個賣魚佬講話有條友仔叫做賭神,係你。哈哈……我當堂嚇一跳,然後得啖笑。呢個世界,居然有人自稱為賭神,噉即係分明當我流唧!嗱!我就叫賭聖,你賭啤都要帶隱形液晶體眼鏡,我就睬你都㩄氣,直情睇穿牌嘅,呢啲就叫特異功能。呢度有隻煙屎,只要我輕輕一捽,就即刻變為一隻皺咗嘅煙士,因為我未發功呀嘛,發咗功變副麻雀出來都得。你話我講嘢無厘頭,我夠話你未瞓醒戇九九咯。望咩呀?條氣唔順呀?發個輪來大家研究下。當然,你要補番一百幾廿萬過我就唔在講㗎啦。睥咩呀?學嘢唔使錢呀?抄低我聯絡電話係︰(香港)三三四五六七八,我再重覆一次係︰(香港)三三四五六七八。你唔搵我我無所謂,因為呢啲係你嘅損失。十點鐘後唔好打嚟,因為我瞓咗!
《漢語大詞典》當堂:I在公堂審理的現場。 《醒世恒言•喬太守亂點鴛鴦譜》:「喬太守寫畢,叫押司當堂朗誦與眾人聽了。」 《二刻拍案驚奇》卷一:「我當堂再審時,叫他口裏扳着蘇州•洞庭山某寺是他窩贓之所,我便不加刑罰了。」 《清史稿•刑法志三》:「刑部將監內應死人犯提至當堂,命吏朗誦罪狀及定擬實、緩節略,事畢回禁。」 II猶當場。 《二十年目睹之怪現狀》第四一回:「這是揚州•戴春林的茶油筒子……講定了十來個錢一個,當堂點過,卻是九十九個都賣了。」 黃谷柳《蝦球傳•陸地的海洋》(按:一九四六至四八年,香港《華商報》副刊連載)他走不上十步,轟隆一聲,地雷爆發,當堂把他炸倒。
《太平廣記•僧俠》引韋入一堂中。乃反鏁之。堂中四隅,明燈而已。飛飛當堂執一短鞭,韋引彈,意必中。丸已敲落,不覺躍在梁上,循壁虛躡,捷若猱玃。《金瓶梅》這李通判回到本宅,心中十分焦燥。便對夫人大嚷大叫道:「養的好不肖子,今日吃徐知府當堂對眾同僚官吏,儘力數落了我一頓,可不氣殺我也!」《金瓶梅》只望相公拿西門慶與嫂潘氏、王婆來,當堂盡法一番,其冤自見。《紅樓夢》察院便批:『張華所欠賈宅之銀,令其限內按數交足,其所定之親,仍令其有力時娶回。』又傳了他父親來,當堂批准。《紅樓夢》一行小字,道是寧國公賈演,榮國公賈法,恩賜永遠春祭賞共二分,淨折銀若干兩,某年月日,龍禁尉候補侍衛賈蓉當堂領訖。《儒林外史》特地把我考在這名次,以便當堂發落,說出周先生的話,明賣個情。
宋曼華(一九五二)撰曲《契爺艷史》(張月兒、鄧碧雲演唱)丑:(接唱)我想你唔好叫我做契爺,改口叫我做契哥。旦:(接唱)唉吔呀契爺,你咁奄尖。丑:(插白)唔,乜你咁奄尖。旦:(接唱)不如畀返張契單你契第個;丑:(白)喂喂喂唔好啩,(接唱)若果你肯叫我做契哥呢,我就當堂冇病,你話其樂如何。

龐秋華(一九六零)撰曲《西河會妻》(任劍輝、羅艷卿原唱)生:(唱曲)眼看沉冤難雪,愧對亡父愛妹與嬌妻。旦:(短序)君子不吃眼前虧。生:(唱曲)告上刑部都堂,旦:(插白)告上刑部?生:(白)系!旦:(白)冇用嘅。生:(白)點解呢?旦:(白)你唔記得喇咩(禿頭滾花)當日東安侯仗義執言,被惡賊當堂棒斃;生:(白)賢妻,你放心啦!(梆子中板下句)刑部孟國良,與我師尊為摯友,為人耿直有權威。鐵面更無私,三朝元老伴龍樓,託孤重臣人敬畏;決意赴京華,盡把冤情來直訴,望持正義力提攜。(滾花)更希望沿路訪英娥,有幸重逢添快慰;


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments