錯手落多左一倍水@@, 然後又落番多的粉…. 溝下溝下… 錯有錯著, 饅頭剛蒸出來好軟熟, (不過隔日就即刻硬晒…)。
以下係材料同份量:
麵粉 600G
黑糖 120G(如果想整白饅頭, 用白糖都可以)
快速乾酵 2湯匙
微暖水 400G
步驟:
步驟1: 將麵粉篩好, 加黑糖, 再混埋一齊, 將黑糖的粒粒和塊塊捽開, 盡量捽散, 和麵粉盡量溝埋。
(終極超級好溫馨提示1: 黑糖通常是膠袋包裝, 裡面是濕濕地、痴痴地的, 完全係無問題的, 比我個腦還要正常。)
(終極超級好溫馨提示2: 快速乾酵母有些要先泡水, 有些不用, 可以參考番包裝上指示。)
(終極超級好溫馨提示3: 微暖水的意思是剛剛微微岩岩暖過手指溫度少少咁大把
然後步驟2: 可以用手…. 或者好似我咁用攪拌機, 或用麵包機的攪拌功能, 用低中速將所有材料搞到一舊野咁, 攪到不痴碗、不痴手、表面光滑為之攪好。
注意: 唔好攪拌過度或太快, 否則麵團會斷筋。好麵團拉開兩邊中間是有好多筋連結兩邊
步驟3: 等麵團發酵約半小時至45分鐘 (由於我用左微暖水溫度剛剛好, 發酵只用左20分鐘)。
步驟4: 分團, 轆成一條長條形, 再切開約18個, 可以直接用切後後的形狀或再搓圓形, 第二次發酵約10分鐘, 可以直接放蒸籠入面發。
又注意: 如果麵包的表面有縐紋或凹凸紋, 發酵或蒸後是不會消失的, 要整光滑饅頭, 要係蒸前、二發後就整形好。
步驟5: 大火蒸5分鐘, 轉中火蒸5分鐘, 就完成。
有興趣整菜肉包的話下次再講餡。
