Mr. Roo 袋鼠先生：越式(其實係唔係真係越式?)蒜蓉牛油雞翼

有人話係越南其實食唔到越式蒜蓉牛油雞翼，亦有人話就算係越南食到都因為係香港人成日問所以後來先有越南人去整的。呢味菜的來源同典故呢，相信大家都其實無咩興趣深究喇，我地不如都係入正題吧啦。

材料呢：
雞翼（中翼全翼都得）1.5公斤（約２０隻全翼）
醃料:
生抽　40ML
老抽 　40ML
魚露 　40ML
雞粉 　半茶匙 (即係茶餐廳撩奶茶果隻)
糖 　　2湯匙 (即係食飯/飲湯果隻)
麻油　 1湯匙

麵粉　1公斤
油　　約1公升

牛油 　40G
蒜蓉 　約半個蒜頭

第一個步驟：醃雞翼，我醃果時因為好趕，只醃左１小時左右，味道可以，但如果唔趕既就醃多幾個鐘、半日或者醃過夜啦。
（終極溫馨超級醒神提示：用保鮮袋醃，原因圖解係叉燒文有（https://www.facebook.com/HiMrRoo/photos/pb.732535323558863.-2207520000.1444660572./737005236445205/?type=3&theater，醃到一半就反轉），咁原本只係浸住底果層的醃料就可以醃埋上面果層。

醃完，步驟二：準備一碗麵粉，碗口越闊越方便，份量約１公斤，一定會用唔晒的，因為呢個步驟要隊的雞翼落的麵粉度，份量基本上唔可以預得岩岩好。

步驟三：上粉，每次幾隻，因為一次整晒1.5公斤的話，粉會好快濕淋淋。

步驟四：落油鑊，油要夠深浸過雞就得喇，呢次無用溫度計，見開始有少少煙或者油好似係個鑊入面會＂流來流去＂就用竹筷子試，放筷子入去有起泡但唔太多泡溫度就岩（或者約１８０度Ｃ）。

步驟五：將已上粉的雞翼落油鑊（無須上刀山）。

步驟六：將已炸起的雞翼放埋一邊，然後炸完所有雞翼。

步驟七：拎另一隻鑊或者洗左呢隻鑊，再開火落牛油同蒜蓉，蒜蓉開始啡啡地同有香味就將的雞翼隊番落去，令牛油均勻完滿活色生香咁包住隻雞翼。

就完成喇。

搞左三粒鐘……

Comments