【讓子彈飛】宇子飛:中國走資派特別鍾愛海外房地產的原因

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

house

圖片來源:Chi King

8月6日,港股市況低開後早市持續窄幅反覆,令人昏昏欲睡;看看手錶,中午12:00尚有半小時才到,但已令人寂寞難耐;子飛不由在想,怕且班炒鬼好似我、無心戀戰者不在少數吧?

想時遲、那時快,手機顯示,醒王來電!子飛心想,來得正好,有人吹吓水時間可以過得快啲!我欣然接聽,搶着道:「老醒,有乜好嘢介紹先?」

點知傳來醒王聲音,道:「子飛,hold住條線、唔好收線,等我接通埋另一邊響加拿大溫哥華嘅老友記水哥,實行嚟一個越洋conference call,好嗎?」

我來不及反應,已傳來「無限可能」嘅「hello」一聲,道:「醒王,子飛,您哋好,我係Walter麥,花名叫阿水!係咁嘅,尋日響網上睇咗子飛您在本土新聞《中國走資潮》篇大作後,因為自己早排亦做咗啲人仔一年定期,到期日係明年3月,諗落唔多對路,想提早贖回;之不過Vancouver呢度嘅中國銀行話要罰息;搞到我不知點算好!好在省起老友記醒王係中國通,就發個輪請教佢;點不知佢話同您好friend,仲叫我直接同您對話添,希望冇搞住您?」

我心想,醒王都夠晒老友,連海外同胞呢招都出埋,睇怕又要請番佢飲茶,欣然道:「其實我都係估估吓㗎咋,因乜解究水哥您又信到十足?」

水哥道:「無他,一來係因為您言之成理;二來,因為我喺烈治文係做地產經紀㗎,近日真係發覺,忽然多咗啲強國人買家,搭晒路咁款、話想揾啲小型、10層8層高嘅Apartment(公寓)嚟收租;似乎唔同以前單買獨立house嘅習慣,諗落係有啲奇怪噃!」

醒王搭嗲道:「買獨立屋同埋買公寓收租有何分別?點解會覺得奇怪?」

麥水回應道:「大哥,您有所不知,同香港嗰邊唔同,加拿大呢度有啲市鎮,的確係有租務管制嘅法例,規範咗業主每年唔可以加租多於7%至10%不等;變咗買入呢啲老化咗(大多樓齡超過15年)嘅物業,維修、管理開支費會隨住時間不斷上升,分分鐘會多於封咗頂嘅租金升幅,令到回報率持續下滑;所以,冇乜精明投資者會對呢啲投資有興趣,事關買入呢啲豬頭骨,等如係買入咗新嘅頭痛,邊處有人會『制』?」

我恍然大悟,問道:「咁,買獨立屋又如何?」

麥水道:「大大不同。因為限加租法例只針對多層大廈的公寓,事關政客當年為了選票承諾要照顧基層人士,所以才催促市政府立法;但事到如今,因為建築新獨立屋的承建商為了推銷新建房,已成功說服政客豁免租值上限法例,所以,買獨立屋收租回報率肯定較公寓式的高得多!」

我忽然好像捕捉了一點關鍵,正想講出嚟,點不知,醒王搶韁,道:「咁我明白晒;第一,個買家肯定大把流動資金,買入呢啲舊公寓起碼有70、80伙租客,租金收益條數一來夠大,二來夠集中(在一屋簷下)方便管理,三來舊有舊好,仲可能有折舊率可報稅添;之但係,相對於買幾十間獨立屋不可能買在同一區域,管理上不可行,所以財大氣粗嘅強國人,先至會以逆向思維反其道而行!分分鐘如果啲錢唔多見得光,納啲稅俾加拿大政府,啲錢隨時可由黑變白,何樂而不為?」

我佩服醒王轉數夠快,道:「仲有嘅係,咁大舊錢唔去買啲流通量超高嘅加國政府AAA債券,或者美國T-Bills,反而去買不動產,相信係CASH FLOW大把,而且短期不需要把資產沽出才會咁做!」

醒王瞬即回應道:「咁咪即係話,如果響其它穩陣啲既房地產市場,例如多倫多、倫敦、雪梨、紐約等國際城市都見到有類似情況的話,就可確定,中國嘅資金外逃現象係堅、唔係流?因為如果係短線嘅熱錢,就會揀流動性高嘅資產嚟投資,而唔係房地產!怕者呢班晨早調晒啲錢出國嘅春江鴨,收到料中國呢舖有排頭痕!

「換句話講,等我呢幾日逐個CALL海外地產經紀老友,做一個survey,睇吓係咪各地都係一窩蜂搶公寓式物業,就可證實子飛嘅理論了!」

輪到麥水,道:「兩位大哥講嘅東西我明啲唔明啲,本來可慢慢請教,但係我呢邊已入黑、要早啲揸車返閨,不如第日傾過?」


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments