【投稿】毛言地:係香港要上車真係要等沙士再爆過?

Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

韓國旅客係青衣站睇完醫生懷疑感染新沙士依件事經網上瘋傳之後以經冇咩人唔知。正當大家都話韓國旅客累街坊既時候,有人講左一句「我未搵夠錢買青衣城喎」。或者你覺得佢冇人性,依個時候仲諗住樓價會跌可以入平貨,但無奈係一個所謂「正常」既香港你要買樓係天荒夜談。

moyin

早前中大研究先話唔食唔住乜都唔用儲錢買樓都要十四年,仲要未知十四年後個樓市升成點,係咪真係夠比首期。成日話等經濟樓市泡沫爆破啲樓自然會跌返價,但我真係唔知要等到幾時,反而望新沙士係香港再爆發好似仲實際。你話咁樣好冇人性好賤格都好,但要係而家物價樓價高到痴線既香港買到一個「瓦遮頭」仲可以有咩方法?

回望返零三年香港沙士爆發,帶比我地既除左係一個個英勇救人既醫生護士捨己救人之外就係樓市大地震。當年淘大花園依個重災區甚至出現五十五萬既成交,對比近期幾個單位大約要四百萬簡直係差天共地。當年我地大家係沙士時期都只係記得洗手洗手洗手同埋中招既醫生護士可唔可以脫離鬼門關,反而唔係太多人仲有閒情去關注個樓市。

但到左而家咁既時勢,當新沙士再次出現係香港之際仲有人先關心樓價係咪會再大跌並唔係化表佢地冇人性,一黎而家香港仲未到上次淪陷既地步,按照香港人針唔拮到肉唔知痛既習性,除非有香港人因為新沙士而死,唔係既話都唔會識驚;二黎就係證明香港既樓市實在太高,高到只要有上車既機會香港人都唔會放過,上車比一切都重要。

就算你再比心機做野,得到老闆賞識升職加薪都好,你一個月份糧可能都只係啱啱好係香港買一尺甚至半尺地磚。拍拖同居?結婚?你突然覺得同女朋友之後既路冇可能行到落去,唔同結左婚都仲要分開住?排公屋都唔係我地依班五星香港人可以做既事,反正到最後都會比班新移民甚至係肖友懷依類唔合法既人搶哂啲單位。

以前啲人會話大個出黎打工養起頭家,但而家既後生出黎打工連自己都就黎養唔掂,仲點養得起最少都要四五百萬既家?當一個人幾努力都唔可以買到一間屋既時候,佢就只能望自己中六合彩頭獎,或者買中今晚德國對美國既半場二比五依個九千倍波膽。如果連橫財運都冇,到左依個時候真係望新沙士係香港爆發先有買樓既希望。你話我黑心?最起碼我都仲覺得自己比起黑警好囉。

作者專頁


Share This:
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Comments