【讓子彈飛】宇子飛:炒股最高心法——BLASH


bullet6022

圖片來源:John Spade

六月二十一日,周日,老友例牌飲茶聚會因適逢父親節,雖然只有陳騰及醒王出席,氣氛亦頗融洽!

只見醒王手上有電腦印出恒指圖表,可想而知,是想以圖表論市,一展其所長!

但開場白則是:「子飛,上證指數A股俾你唱淡之後,上星期由5100點之上高台跳水直插,周五急跌至4478點,單一星期竟出現逾13%的跌幅,應該係中國A股史上最殘酷的殺倉之一,你係咪贏到開巷先?今日睇怕係你請飲茶!」

我苦笑地回應,道:「飲茶邊個請有乜所謂!點話點好!最慘係,自己睇中A股泡沫會隨時爆破,之但係,就冇買A股ETF嘅PUT輪,到頭嚟,都係中空寶嗰隻!而揸緊嘅H股ETF咪一樣坐緊艇!」

陳騰亦即刻回應,道:「我咪仲黑仔!如果嗰日我睇完你嘅網誌先,就唔會貿然入咗D中資金融股,甚麼混改都幫唔到我,坐艇在水中央,唉!」

我回應道:「唔係你錢,唔入你袋,冇偈!計我話,上周五A股嘅『端午劫』,一來因為撞正中國股指期貨結算,班莊家為咗響假期前套現及盡焯,先至跌大咗;二來,據了解,係人踩人嘅恐慌拋售累事!」

陳騰:「子飛,可唔可以解吓畫,因乜解究會恐慌成咁?」

我喝一口茶,續道: 「即係話,市勢逆轉下,有D中國孖展(中國稱配資)客因為觸及斬倉位被迫強制平倉;而大量資金因而跟風撤離,引起股指下跌;咁搞法,又進一步觸及其他孖展客的風險底線,因此帶嚟嘅恐慌情緒,難免蔓延到整個股市,最終造就了驚悚的6/19”端午劫”,經驗所談,應該係跌過咗火位,所以,反而唔排除係終極一跌!」

陳騰卻道:「子飛,但係內哋D內幕知情人,聽講越沽越多,據報,2015年以來,半年時間,A股公司股東減持套現已然超過去年全年(來自Wind資訊的數據,從年初至6月17日,已有1234家上市公司發布了重要股東或高管減持公告,減持股數350.31億股,累計減持市值約4771.5億元)!沽得咁狠,點會咁快就收手先?」

我冇諗過陳騰對D數據都瞭如指掌,啞然失笑道:「老陳,炒賣嘅最高心法叫做BLASH,你聽過未?即係話,(buy low and sell high),中文就係低吸、高沽!

班莊家本來想沖高散貨俾大摩MSCI基金佬入A股,事與願違下,唯有退而思其次質俾老散!家陣出現恐慌拋售,相信反而會有外資趁低撈底!

當日北向買A股滬股通額度轉趨活躍,達78.04億元人民幣(60%),係自滬港通開通以來的第二峰值(最高峰出現在滬港通開通的第一天,當日130億元的額度全部使用完),值得加以注意!

此外,當日AH股溢價指數回落至127.5,較早前嘅142低多咗,意味着,A股估值雖然比H股估值要高27.5%,但相對早前嘅貴42%,down to earth 好多啫!」

至此,一直默不作聲、全神貫注睇住圖表嘅醒王,忽然話:「趁中國股市周一休市,不如大家一齊研究下,恒指月底前支持位響邊?年底會升到邊,咪仲實際?」

圖表研究技術分析如下:

chart2

Chart Courtesy of Megahubhk.com (按圖放大)

以月線圖型態看恒指後市可升抵30500/33808間

2007年11月,恒指由31897開始見頂回落,大幅波動反覆下,於2008年低見10676。而由10676開始的彈升,至2010年11月,最高見24989。

倘若以31897為跌浪起點,連接24989伸延而落;再配合由10676為彈升浪起點,連接2009年3月低點的11345、伸延而上,不難發覺反彈勢頭已於2012年10月,向上突破了一個楔型旗型態。

而由於楔型旗型態是延續型態,雖說於2013年1月,一度由23916連跌5個月、低見19426,整體上升軌未有被破壞;

回到2015年4月,經已向上突破上升三角型的頸線,意味着,後市 (18個月內) 順風順水的話,恒指量度升幅可見33808(24989減16170加24989);

事實上,由2008年9月高點的21067,連接24989伸延而上;以及由10676連接11345伸延而上,兩者間的平衡上升通道頂直指34000附近,與上述所說的33808如出一轍;

換言之,2015年4至6月,恒指由28589回落,低見26553的調整,根據2013年6月的經驗來看,後抽回調應不會跌回上升三角型的頸線249XX (事關2013年當其時,是因歐債危機整體越演越烈所致,與目前微不足道的希債危機相比,震撼度大不如前) ,故此,就算6月底結算仍有餘震,仍可企穩於26200樓上機會甚大!。

結論是,向下望,由目前的26760,就算真的回落至4月份長身陽燭底部的24926,或有的回調幅度只不過是1834點;但倘若是由262xx止跌回升,年底前升抵30500(擴散喇叭型上升通道目標)或以上的話,則或有升幅可達4000點以上;也就是說,目前水平267xx/262xx入市博反彈,值博率是挨近1博2,不俗也!

(免責聲明:股票買賣可升可跌,上述看法非是買入、賣出或邀約的建議,純粹是技術研討課題而已。)


Comments